18 de dec. de 2012

FELICES FESTAS!





Cara Belén camiña
unha Nena ocupada
fermosa, en canto a ela,
San Xosé a acompaña.

Chegaron a Belén
e pediron pousada,
responderon de adentro
con voz alborotada.

¿Quen chama á miña porta,
quen á porta me chama?
Somos Xosé e María
que pedimos pousada.

Se traen cartos que entren
e senón que se vaian.
Cartos non traerei,
máis que un real de prata.

Isos son poucos cartos,
pídanno noutra parte.
San Xosé xa penaba,
María o consolaba.

Non te apenes Xosé,
non te apenes por nada,
¿que máis cartos ti queres
que isto que me acompaña?

Nadal de Luintra (Berrogüetto)

 

15 de dec. de 2012

AGASALLOS DE NADAL: "ABERTOS AO GALEGO"

A Mesa pola Normalización Lingüística presenta o Catálogo de Nadal Abertos ao Galego, un abano de servizos e produtos en galego producidos polas empresas adscritas ao proxecto "Abertos ao Galego", que pode ser de utilidade como proposta para os agasallos típicos destas datas de Nadal, Aninovo e Reis.
Para máis información picade no seguinte enlace:



12º PROGRAMA DE RADIO "AF/DC: A FUME DE CAROZO"

O próximo martes, 18 de decembro, teredes a oportunidade de escoitar o último programa de "A FUME DE CAROZO" deste ano 2012.
Serán alumnos de 6º de Educación Primaria os encargados de conducir o programa, coordinados pola profesora Fabiola Pena, e que nos falarán da cidade da Coruña.
Como ambientación musical poderemos escoitar cancións relacionadas co tema compostas por varios grupos coruñeses.

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.


8 de dec. de 2012

11º PROGRAMA DE RADIO "AF/DC: A FUME DE CAROZO"

O vindeiro 11 de decembro poderedes escoitar, como cada martes de 17:00 a 18:00 h., un novo programa de "A FUME DE CAROZO".
Nesta ocasión, dous alumnos de 2ºBacharelato, Javier Barreiro e Santiago Varela, realizarán un monográfico musical sobre o grupo galego "A Quenlla"

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.

30 de nov. de 2012

10º PROGRAMA DE RADIO "AF/DC: A FUME DE CAROZO"

O próximo martes, 4 de decembro, no programa de radio "A FUME DE CAROZO", catro alumnos de 2º de Bacharelato, Jorge Fernández, Mónica Sánchez, Marcos Sánchez e Alejandra Varela, entrevistarán a Rosa Martínez, Manuel Velasco e Raúl Acción, tres grandes persoas que ata hai moi pouco traballaron no noso centro como mestres e que marcaron a traxectoria académica e vital de moitos dos seus alumnos e ex-alumnos.

Composicións do colectivo musical galego máis coñecido nos anos finais da ditadura franquista, Voces Ceibes, porán a nota musical a este programa.

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.


29 de nov. de 2012

CULTURGAL 2012: A FEIRA DAS INDUSTRIAS CULTURAIS

"A CASA DA CULTURA GALEGA É A TÚA CASA. TI TES A CHAVE"
Con estas palabras dános a benvida, un ano máis, CULTURGAL, unha gran casa construída entre os distintos gremios da cultura: libro, creación audiovisual, artes escénicas, música, deseño, internet e novas tecnoloxías. Un evento único, de periodicidade anual, que chega á súa quinta edición consolidado como a gran cita das industrias creativas en Galicia.
CULTURGAL é unha romaría á que acoden miles de persoas para coñecer de primeira man as novidades editoriais, o último en música, o glamour do audiovisual, a maxia das artes escénicas, os avances das novas tecnoloxías e mesmo as propostas máis marxinais en tres días de actividade sen tregua, dende o 30 de novembro ata o 2 de decembro, no Pazo da Cultura de Pontevedra.
Picade no seguinte enlace para ver o seu programa xeral:



23 de nov. de 2012

RECEITAS

Os alumnos de 1ºESO, nun exercicio de creatividade na materia de Lingua Galega, tiveron que compoñer un receitario con pratos e doces apetecibles e orixinais que forman parte da gastronomía popular.

Se queredes ir abrindo boca... picade na sección "RECUNCHO CREATIVO" ou no seguinte enlace...

BO PROVEITO!


9º PROGRAMA DE RADIO "AF/DC: A FUME DE CAROZO"

O vindeiro luns, 26 de novembro, no colexio imos celebrar unha gran festa para honrar, un ano máis, ao noso fundador San Xosé de Calasanz, patrón das escolas populares cristiás. 
O seu gran día é o martes 27, por iso o programa de radio "A FUME DE CAROZO" xirará arredor da súa figura e desa gran celebración. 
O Departamento de Pastoral será o encargado de conducir este espazo.

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.


22 de nov. de 2012

GALICIA E O CINEMA: "INVASOR"

O filme "Invasor", dirixido por Daniel Calparsoro, producido pola galega Vaca Films e por Morena Films, e participado pola TVG, estrearase o vindeiro 30 de novembro.
Tras un atentado que case lle custa a vida, Pablo, un médico militar español destinado nunha misión internacional, regresa á casa convalente xunto á súa muller e a súa filla. Pablo sospeita que lle están ocultando información sobre as circunstancias do atentado e, a pesar da presión dos altos mandos, négase a secundar a versión oficial poñendo en perigo a súa seguridade e a da súa familia.
Gran parte da rodaxe tivo lugar na Coruña e comarca, en zonas como Ferrol, Betanzos, Sada e Oleiros, que acolleron boa parte da gravación das secuencias en exteriores.
E, ademais, a Orquestra Sinfónica de Galicia foi a encargada de poñer a música á composición de Lucas Vidal para a película.
O seu protagonista, Pablo, interpretado polo actor Alberto Ammann, convídavos a vela. Velaquí o tráiler galego...



18 de nov. de 2012

EDUCACIÓN INFANTIL: CELEBRACIÓN DO SAMAÍN

Celebramos hai unhas semanas a festividade do Samaín, a fin do tempo das colleitas e o comezo do inverno.
Os máis pequechos do cole deron saída á súa creatividade e adobiaron numerosas cabazas das máis extraordinarias e marabillosas formas, converténdoas en piratas, princesas, pantasmas, animais...
Se lles queredes botar unha ollada, picade aquí:



16 de nov. de 2012

8º PROGRAMA DE RADIO "AF/DC: A FUME DE CAROZO"

O vindeiro martes, 20 de novembro, volveredes a ter nas ondas o programa "A FUME DE CAROZO"
Nesta ocasión varias alumnas de 1º de Bacharelato entrevistarán a Tucho Calvo, xornalista e escritor galego, así como un dos responsables de Biblos Clube de Lectores, para que nos fale e nos achegue a figura senlleira de Valentín Paz-Andrade, home polifacético (xurista, político, empresario, escritor, xornalista...) ao que se lle adicou o Día das Letras Galegas deste ano 2012.
A ambientación musical correrá a cargo do grupo galego Milladoiro.

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.

11 de nov. de 2012

7º PROGRAMA DE RADIO "AF/DC: A FUME DE CAROZO"

O próximo martes, 13 de novembro, teremos a oportunidade de escoitar un novo programa de "A FUME DE CAROZO"
Desta vez, serán catro alumnos de 1º ESO (Desiree Álvarez, Jacobo Álvarez, Andrea Barreiro e Juan Ángel Fernández) os encargados de conducir este espazo. 
Falarannos da música tradicional galega (historia, ritmos, instrumentos e artistas máis senlleiros) e contarán coa ambientación musical de grupos e cantantes galegos tan recoñecidos como Fuxan os Ventos, Milladoiro, Carlos Núñez, Uxía Senlle, Luar na Lubre...

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.

6 de nov. de 2012

XUNTANZA "REVISTA CROA"

Mañá, mércores 7 de novembro, no primeiro recreo (ás 10:10 h.) e na Aula de Informática, terá lugar a xuntanza da "REVISTA CROA"
Como vén sendo habitual dende hai anos, aqueles alumnos interesados en participar na elaboración da nosa revista escolar, poderán facelo inscribíndose nalgunha das actividades relacionadas con ela (entrevistas a ex-alumnos, pais de alumnos, persoeiros do mundo do deporte, das letras e da música; crónicas de excursións e saídas culturais; reportaxes sobre temas diversos; elaboración de cómics, textos de creación literaria, debuxos...).
Ademais, este curso celebramos algo moi importante, o "25º ANIVERSARIO" desta gran publicación. Por isto e por moito máis, animámosvos a que todos aqueles que queirades colaborar e deixar a vosa pegada neste número tan especial, poidades facelo.  Enviádenos as vosas aportacións e suxestións ao seguinte enderezo: revistacroa@yahoo.es

2 de nov. de 2012

6º PROGRAMA DE RADIO "AF/DC: A FUME DE CAROZO"


Para celebrar o DÍA DA CIENCIA EN GALEGO, que é o 5 de novembro, o programa de "A FUME DE CAROZO" do martes 6 de novembro estará dedicado a científicos galegos.
Contaremos coa presenza na emisora de catro alumnas de 1º de Bacharelato: Andrea Camba, María Corral, Alba González e Ángela Veiga.
A ambientación musical correrá a cargo do grupo galego Berrogüetto, con composicións do seu disco "10.0".
 
Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.


DÍA DO ENSINO: PARABÉNS!

Hoxe, día 2 de novembro, celebramos o DÍA DO ENSINO.
Tomamos como noso o agradecemento que unha profesora galega fixo hai uns meses nun artigo seu publicado na prensa:

Parabéns a todas as persoas que enchen a súa vida e a dos demais con palabras e expresións galegas!
Parabéns a todas as familias que seguen a legar aos seus fillos o noso maior patrimonio cultural!
Parabéns a todas as familias galegas que, conscientes de non seren fontes de transmisión natural da nosa lingua, demándana na escola como principal espazo de aprendizaxe e comunicación integradora!
Parabéns a todos os docentes que reforzan no alumnado a descuberta e a adquisición progresiva do noso idioma propio!
Parabéns a todos os educadores!





28 de out. de 2012

SAMAÍN

A antiga festividade céltica do SAMAÍN descríbese como unha comuñón cos espíritos dos defuntos que, especialmente nas datas do 31 de outubro ao 1 de novembro, terían autorización para camiñar entre os vivos. Ábrense as portas entre este mundo e o alén, dándolle á xente a posibilidade de reunirse cos seus devanceiros mortos.

Na sección "E. PRIMARIA" atoparedes máis información sobre esta celebración cuns xogos para pasar o rato á espera de poder celebrala nestes próximos días no colexio.



VÍDEOCONTOS PARA OS MÁIS PEQUENOS

A Secretaría de Xeral de Política Lingüística  ofrece uns vídeocontos, desenvolvidos por OQO Editora, para gozar e traballar cos máis pequenos ou en familia, un material audiovisual moi valioso para dinamizar e fomentar o emprego do galego entre os máis novos e non tan novos. 

Se queredes ver e escoitar algún deles picade na sección "E. INFANTIL" deste blog que aparece na marxe esquerda. 

E se como profesionais do ensino quer
edes traballar con eles e utilizalos cos vosos alumnos, picade nos enlaces de propostas didácticas que aparecen debaixo de cada unha das curtas de animación.

26 de out. de 2012

5º PROGRAMA DE RADIO "AF/DC: A FUME DE CAROZO"

O martes, 30 de outubro, unha vez máis poderes escoitar o programa de radio realizado por membros do noso colexio, "A FUME DE CAROZO"
Nesta ocasión, o protagonismo recaerá no coordinador do Departamento de Acción Social, David García, na alumna de prácticas de Educación Social, Natalia Carreño, e en dúas alumnas de 1º de Bacharelato, Marián García e Laura Martínez.
Entrevistarán á psicóloga do IBS Padre Rubinos, a un alumno con necesidades educativas de Aspronaga e a Alba, unha alumna de Educación Social que traballou en cárceres e en México con nenos desfavorecidos.
O acompañamento musical será variado, con composicións de Carlos Bau, Ataque Escampe, Capitán Furilo, Yuno e Loretta Martin.

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.
 

25 de out. de 2012

"OS BOLECHAS"

OS BOLECHAS son dende hai máis dunha década toda unha revelación editorial en Galicia e tamén protagonistas da máis importante e exitosa serie da nosa literatura infantil. Causan verdadeiro furor e contan cunha auténtica lexión de fieis seguidores entre os máis pequenos.

O seu éxito, en palabras do seu creador, Pepe Carreiro, débese a que os seus protagonistas, seis irmáns (Carlos, as xemelgas Loli e Pili, Braulio, Sonia, o pequeno Tatá e o seu incondicional can Chispa) viven aventuras en situacións e realidades moi cotiás para os nenos: a casa, a escola, o parque, o autobús, a praia... Esa proximidade e a súa forma de expresárense fan que os nenos se sintan cómplices e coprotagonistas das súas aventuras.

Con todo, o trazo máis salientable e diferencial de OS BOLECHAS é que é unha serie creada e desenvolvida totalmente en Galicia e que ademais emprega o galego na súa versión orixinal, xogando un importante papel na promoción e difusión do idioma.

Dende hai xa un mes, ademais, podémolos atopar na canle tvG2, onde cobran vida de luns a xoves, nas franxas do almorzo e da merenda, e os sábados pola mañá no programa do Xabarín Club, dentro da programación infantil en galego co obxectivo de salvagardar a lingua propia para as xeracións futuras.


E, como non podía ser menos nos tempos que corren, tamén contan coa súa propia páxina web, www.osbolechas.com, onde se poden atopar xogos e un libro interactivo.

20 de out. de 2012

HAI QUEN DI QUE AS PALABRAS AS LEVA O VENTO (por Mercedes Queixas)

"Hai quen di que as palabras as leva o vento... O que algúns non saben é que as leva sempre dun corazón a outro a través dun bico sonoro, dunha aperta apertadiña, dun segredo que visita caladiñamente o oído, dunha chiscadela de ollo que só ti comprendes, dunha noitiña emburullada que asoma por debaixo dun libro, dunha sobremesa celmosa, dun filme de animación, dun soño ridor, dun conto triste ou dunha canción falangueira.
E cando unha palabra nova nos acariña a pel pode facernos cóxegas e darnos ganas de rir, de brincar, de bailar, de xogar á pilla-pilla, de berrar, de chorar, de durmir, de soprar, de cantar, de calar ou abrir a boca coa sorpresa.
Por iso, por cada palabra que alguén non nos aprende ou deixamos que a leve o frío vento do nordés cando zoa, perdemos a palabra e tamén perdemos un bico, un aloumiño, unha cantarela, unha bágoa, unha sorpresa, un arrecendo, unha idea ocorrente, un sorriso, un alento, unha pregunta, unha resposta, un soño, unha ilusión, unha viaxe ou unha amizade.
Mamá aprendeume a apreciar a calor do peito, a catar o sabor do leite, a descifrar as cores irrepetíbeis das bolboretas, a atravesar as rúas, sempre vixiante, nos pasos de peóns e a vestir a roupa polo dereito.
Papá axúdame a construír castelos de area na praia, a bailar o trompo, a programar o lavalouzas, a nomear as estrelas desde o telescopio nas noites de verán e a comer os espaguetes con garfo e culler.
Miña irmá garda a súa saia favorita para cando eu sexa maior, preséntame as cores do arco da vella, e enrédame para bailarmos xuntas os nove números co rato do computador.
A avoa púxolles nome aos meus cinco dedos: o pequeniño, o medianiño, o pai de todos, o furabolos e o escachapiollos e o avó abaloume primeiro no berce e agora no bambán do parque.
Co padriño xogo aos birlos e á chave na fin de semana, cántolle ao caracol para que poña os cornos ao sol e inspiro o arrecendo natural do fiúncho. A madriña lévame ao mercado para non confundir a xarda e a xouba, a sardiña e o xurelo, o peixe sapo e o abadexo.
Coa curmá Xoana aprendo os nomes das vacas da súa casa da aldea (a Roxa, a Pinta e a Canela), das flores da fraga (as chorimas, os belitroques, as margaridas, as papoulas e os couselos) e descifro a lingua do moucho cando fala polas noites.
Todos me axudan a nomear e comprender o mundo en que vivo. Coas súas palabras, que eu fago miñas en canto me acariñan a pel, aprendo algo novo todos os días. Sei que sempre hai unha palabra que está a agardar agochadiña para que eu a descubra.
E cando os meus me entregan algunha palabra, eu correspondo lembrándolles aqueloutra que xa lles roubou o frío vento do nordés ou hai tempo que non usan porque a deitaron arrombada no celeiro dos esquecementos ou trocaron por outra allea pensando que campa máis. E preséntolles o mel doce, a estrada perigosa e a beirarrúa protectora, o luns que abre a semana, o amorote vermello, o reiseñor melodioso, o verme de seda, o lucecú noctámbulo, o golfiño brincador, o novo rato sen dentes do computador, a xoaniña voadora, o vídeoxogo bulidor, as dedas dos pés, as luvas para as mans e o vello atlas do mundo onde medran todas as palabras galegas ao carón doutros moitos milleiros de sons harmónicos. A rede de palabras coa que a min me agasallan e alimentan na escola para quererme e mirarme no espello do mundo con voz e imaxe propia."

 Mercedes Queixas, en "Sermos Galiza", 22/07/2012

18 de out. de 2012

4º PROGRAMA DE RADIO "AF/DC: A FUME DE CAROZO"

No cuarto programa de "A FUME DE CAROZO" deste curso, que poderedes escoitar o próximo martes, 23 de outubro, de 17:00 a 18:00 h., os novos cargos do equipo directivo do noso colexio, o Director Xeral e de Bacharelato, Juan Pablo Santiso, a Directora de ESO, Soraya Porto, e a Directora de EI e EP, Esther Ponte, van ser entrevistados por tres alumnos, Lucía Pedrosa (alumna de 1ºESO), que repite unha vez máis como presentadora, e dous compañeiros de 1º de Bacharelato, Diego Lorenzo e Jorge Silvosa.
A música ambiental correrá a cargo dun dos grupos galegos con maior proxección internacional, Luar na Lubre, con composicións recollidas no seu primeiro disco titulado "O son do ar", editado en 1988.

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.

12 de out. de 2012

VIII XORNADA DE NORMALIZACIÓN LINGÜÍSTICA

O próximo venres, 19 de outubro, terá lugar a VIII Xornada de Normalización Lingüística no Auditorio da Biblioteca da Cidade da Cultura, en Santiago de Compostela, organizada pola Comisión de Normalización Lingüística de FEREGA-CECA (Escolas Católicas de Galicia).

A programación da Xornada será a seguinte:
  • 9:15 - Recepción e recollida de documentación.
  • 9:30 - Inauguración da Xornada, que correrá a cargo de D. Valentín García (Secretario Xeral de Política Lingüística da Xunta de Galicia) e de D. Xosé Fco. Martínez Reboiras (Secretario Autonómica de FEREGA-CECA).
  • 9:40 - Homenaxe a Celso Emilio Ferreiro.
  • 10:15 - Charla de Manuel Núñez Singala: "Os prexuízos sobre o galego".
  • 11:15 - Pausa.
  • 11:40 - Actuación musical de Roberto Sobrado.
  • 12:00 - Obradoiros a elixir: "O xornal dixital" / "Vivir do conto" por Susa Herrera / "A competición de debate. O parlamento xoven" / "Debates 2.0" / "O audiovisual na aula de Educación Secundaria: REC_CURTA" / "Técnicas de fomento da lingua oral na clase".
  • 14:00 - Clausura da Xornada.

3º PROGRAMA DE RADIO "AF/DC: A FUME DE CAROZO"

O próximo martes, 16 de outubro, de 17:00 a 18:00 h. poderedes escoitar o terceiro programa de "A FUME DE CAROZO". Desta vez, estará presentado por tres alumnas de 1º de Bacharelato, Andrea Camba, María Corral e Alba López, que nos achegarán á figura dun dos máis salientables narradores da literatura galega do século XX cun programa monográfico literario dedicado a Eduardo Blanco Amor. O percorrido pola súa vida e obra irá acompañado de composicións do grupo ourensán Camerata Meiga, recollidas nun disco editado en 1999 titulado "Habelas hailas".

Lembrade que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/adfcblog.

8 de out. de 2012

2º PROGRAMA DE RADIO "AF/DC: A FUME DE CAROZO"


Mañá, martes 9 de outubro, de 17:00 a 18:00 h. poderedes escoitar un novo programa de "A FUME DE CAROZO". Nesta ocasión estará presentado por dous alumnos de 2º de Bacharelato, Javier Barreiro e Santiago Varela, que nos farán lembrar aqueles anos mozos dos que moitos gozamos cun monográfico sobre o Xabarín Club.

Lembrade, unha vez máis, que para escoitar este programa, que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes coitar todos os nosos programas xa emitidos, na web www.blogoteca.com/adfcblog.

6 de out. de 2012

LINGUA GALEGA: CONTIDOS E CRITERIOS DE CUALIFICACIÓN - CURSO 2012/2013


Dende o Seminario de Lingua Galega e Clásicas, damos a coñecer os contidos e criterios de cualificación que rexerán a materia de Lingua Galega e Literatura nas etapas de ESO e Bacharelato para este curso 2012/2013.
Para poder velos, picade nas seccións de "ESO" e "BACHARELATO" que aparecen na marxe esquerda na páxina principal deste blog.

1 de out. de 2012

1º PROGRAMA DE RADIO "AF/DC: A FUME DE CAROZO"


Mañá, martes 2 de outubro, de 17:00 a 18:00 h. poderedes escoitar en directo o primeiro programa deste novo curso. Estará presentado pola alumna de 1º de ESO, Lucía Pedrosa, que nos dará a coñecer as persoas que dirixen ou colaboran activamente nos diferentes departamentos do centro (Acción Social, Pastoral, Orientación e Dinamización da Lingua Galega), e nos presentará as actividades que van desenvolver ao longo destes próximos meses. A ambientación musical deixarémola nas mans do músico galego Carlos Núñez.

Lembrade que para escoitar "A FUME DE CAROZO", que se emite todos os martes de 17:00 a 18:00 h., tedes varias posibilidades:
- No 103.4 da FM na comarca da Coruña.
- En directo por Internet, na web da emisora: cuacfm.org, e picar no botón "En directo".
- En diferido, podedes escoitar todos os nosos programas xa emitidos, na web www.blogoteca.com/afdcblog.

28 de set. de 2012

LIBROS FINALISTAS DA IX EDICIÓN DO PREMIO LITERARIO "FREI MARTÍN SARMIENTO"

Outro curso máis ponse en marcha o Premio Literario "Frei Martín Sarmiento", organizado pola Comisión de Normalización Lingüística de Escolas Católicas de Galicia e que xa vai pola súa IX Edición.
Como ben saben moitos dos nosos alumnos, este concurso literario naceu hai xa uns anos no noso colexio como unha idea para fomentar a lectura en galego. A diferenza dos concursos tradicionais, neste son os alumnos o xurado, e premian, tras a lectura de varias obras clasificadas por categorías, o mellor escritor galego do ano.
Dende hai unhas poucas edicións tamén se dá a posibilidade de que exalumnos, pais, profesores e persoal dos centros educativos participen na categoría de adultos.

Para o presente curso 2012/2013, estas son as obras seleccionadas:

1ª CATEGORÍA (1º e 2º de Educación Primaria):

Felicia Fuster,  
Vou ter un irmán (ed. Galaxia).
Un libro protagonizado pola incerteza que unha nena sente cando os seus pais lle din que vai ter un irmán. As preguntas acoden voando á súa cabeciña: e como será?, e como é posible iso?, e como vai cambiar a miña vida?, e os meus pais agora van ser diferentes? Constrúese unha historia divertida que permitirá, a irmáns maiores e a pais e nais co seu segundo fillo en camiño, abordar o tempo da espera dende a comicidade e unha visión moi graciosa do mundo. Porque non hai nada máis fascinante que ter un irmán.


Pinto & Chinto, 
A maceira que daba calquera cousa menos mazás (ed. Everest).
Supoñamos que unha maceira non pode, de primeiras, cumprir coa que se considera unha das funcións da súa existencia... Sería este motivo para acabar con ela? Hai que deixar que o tempo siga o seu curso e, sempre que teñamos a capacidade de reinventarnos e de crer nas nosas posibilidades, a espera será xustificada. Igual que as árbores e os seus froitos, as persoas medramos a un ritmo diferente que non se pode forzar se non queremos quedar na metade do camiño.


Manuel Guisande, 
Rodribico e a noite (Baía Edicións).
Rodribico é un paxariño ao que lle encanta estar forte e vivir todo tipo de aventuras. Rodribico habita nunha inmensa árbore, con grandes pólas, e no seu niño ten todas as comodidades que unha ave pode desexar.







2ª CATEGORÍA (3º e 4º de Educación Primaria):

Xurxo Silvestre Gómez, 
Ti non xogas! (ed. Xerais).
Ti non xogas! Durante unha semana enteira non parou de chover e hoxe por fin saíu un sol radiante. Pero Suso, en vez de estar a xogar ao fútbol co resto dos rapaces, está sentado nun chanzo da escaleira do patio da escola. Está aburrido e amolado. O peor é estar amolado, e estao, porque cando quería xogar Róber chimpoulle: -Ti non xogas! Non houbo ninguén que lle dixese a Róber que iso non se podía facer, que todos poden xogar e ninguén ten dereito sobre os demais. Por iso Suso está amolado, porque non soubo que facer.

Antón Cortizas, 
Rosalía e os equinodermos (ed. Tambre).
Nesta obra cóntase como a noite en que recibe de agasallo un pequeno lapis verde, Rosalía non consegue durmir ben. Entón decide erguerse e escribir con el nun caderno. Entre o silencio da madrugada, percibe unha voz no seu cuarto. É do seu lapis, que ten o don de relatar historias marabillosas.






3ª CATEGORÍA (5º e 6º de Educación Primaria):

Anxo Fariña, 
A chave da Atlántida (ed. Xerais).
Os científicos do "Proxecto Prometeo" crearon A-cero, un ser humano artificial. Un proxecto científico que os bioenxeñeiros da empresa Biomorph desenvolveron a partir da lectura duns pergamiños atopados na fosa Kermadec, cando indagaban sobre a cidade asolagada da Atlántida. Aqueles pergamiños, redactados nunha lingua descoñecida, deixaban ver uns planos nos que se identificaban segredos ocultos, capaces de construír un novo futuro para a ciencia e para a humanidade. A fuxida de A-cero e o seu encontro con Eva e o seu tío Fran desencadeará a busca da chave que permita entrar na Atlántida, unha civilización en estado de hibernación, á que semella poder accederse dende as viguesas illas Cíes.
Esta obra é unha novela de ciencia-ficción na que, a un ritmo trepidante, se mesturan os mitos dunha civilización antiga coas posibilidades ofrecidas polas biotecnoloxías e da robótica do futuro. Unha aventura que non dá tregua, onde non falta nin o amor nin as persecucións nin as probas fantásticas, na que se somete á indagación dos lectores e lectoras novos un dos tópicos da mitoloxía clásica.

Abraham Carreiro, 
Xoeliki (ed. Sotelo Blanco).
Xoeliki é un neno de once anos introvertido e tímido. Xoga aos vídeoxogos on-line e bota horas chateando na Internet. Pasa moito tempo só porque a nai traballa todo o día e o pai morreu hai uns anos. A vida de Xoeliki é moi rutineira, xira arredor da casa e do colexio, ata que un día ocorre un feito misterioso que lla cambiará por completo: recibe un paquete sorpresa. Isto levarao a vivir novas aventuras, coñecer amigas e amigos como Ari, o sabio Barbabranca, o enigmático Maverick, Centulo -profesor de Programación e Desenvolvemento- e algún inimigo como Mr. Virus. Descubrirá cousas inimaxinables para el.



4ª CATEGORÍA (1º e 2º ESO):

Leticia Costas e Pere Tobaruela, 
Mortos de ningures (ed. Everest).
O sangue é vermello? Ata a aparición daquel cadáver a inspectora Nola sempre pensou que si. Na última semana, en Todures apareceron mortos seis inmigrantes procedentes de Ningures. Por que todos eran ningurenses? Cantas persoas máis ían morrer? Por que o sangue daquel cadáver era verde? Que se agochaba tras aquilo? Á inspectora Nola amólalle non dar contestado os interrogantes. Por iso se fixo investigadora: para non deixar ningunha pregunta voando no aire. Coa axuda do seu inseparable gato Lolo, Nola porá toda a súa vontade en resolver este enigmático caso. Pero isto non é garantía de éxito. Ás veces, malia os esforzos, malia o empeño, algúns casos non se dan resolto.

Agustín Fernández Paz, 
Fantasmas de luz (ed. Xerais).
Dende hai trinta e cinco anos, Damián traballa como operador de cabina no mellor cine da cidade. Cando recibe a noticia de que a sala vai desaparecer e que todos os empregados serán despedidos, a súa vida experimenta un cambio extraordinario que tamén afecta a Marga, a súa dona. Dun xeito progresivo, os seus corpos comezan a se volver transparentes, invisibles aos ollos das persoas que viven ao seu redor. 
Empregando recursos da novela fantástica e combinando o suspense cunha delicada melancolía, esta obra fálanos dun dos grandes dramas contemporáneos: o da exclusión e a invisibilidade á que se ve sometida unha parte da sociedade. Tamén quere ser unha homenaxe ao cine, tanto ás vellas salas que foron esmorecendo como ás grandes películas que, sen seren a vida mesma, "axudan a entendela e enchen de esperanza o corazón".


5ª CATEGORÍA (3º e 4 ESO / Bacharelato):

Carlos Laredo Verdejo, 
Lena e o lobishome (ed. Tambre).
Unha noite de verán, ao volver da verbena, Lena vive unha experiencia asombrosa, entre o soño e a fantasía, preto das ruínas do vello mosteiro oculto na fraga. Fraga e ruínas que agochan tamén unha lenda chea de misterios que a moza e as súas curmás tratan de descubrir. Existen as bruxas? Existen os lobishomes? Ninguén cre nesas cousas, pero cando ocorre a primeira desgraza, o medo apodérase da xente das aldeas veciñas e unha historia de paixóns e vinganzas xorde do fondo da memoria dos vellos, como xorden as sombras da cripta afundida debaixo do convento.

X. H. Rivadulla Corcón, 
O noso amor será eterno (ed. Xerais).
O trobador Buserán tiña dezaoito anos, era home forte, de mirada chea de nobreza. A súa amada, Frolinda, tiña 16, posuía unha beleza que estremecía os seres sensibles e o seu corazón estaba enchido de bondade e xenerosidade. Sentiron que querían estar abrazados, cada un habitar nos brazos do outro, comprenderon que nada na vida tería sentido se non a vivían xuntos, xuraron que seguirían unidos, pasase o que pasase. Buserán prometeulle que a forza do seu amor non sería inútil e Frolinda aseguroulle que o seu amor sería eterno. Rocío e Ramón, veciños da mariñeira vila de Muxía, ese mascarón de proa da vella Europa, coñecerán no cantil da furna Buserana a fermosa pero tráxica historia de amor eterno entre aquel trobador e a súa namorada.

6ª CATEGORÍA (Adultos):

Manuel Rivas, 
Todo é silencio (ed. Xerais).
Esta obra narra o irresistible ascenso social de Mariscal, un capo contrabandista, e das almas que habitan Noitía, o universo que domina ao seu antollo. En Noitía, na costa atlántica, houbo un tempo en que as redes do contrabando, reconvertidas ao narcotráfico, acadaron tanto poder que estiveron moi preto de controlar o poder social e as institucións. 
Nesta novela nárrase tamén a vida dun grupo de amigos, aos que une dende a infancia o andar ás crebas, á procura de restos de naufraxios, no escenario sempre sorprendente do mar de Galicia. Ese mar que fala cos signos que deita na beira. Dende moi pronto, o destino da xente nova estará determinado pola sombra odiosa e engaiolante a un tempo do omnipresente Mariscal.
Unha obra que relata como os círculos do crime rodean e corrompen, non sempre con éxito, o estraño feitizo da condición humana.


Antón Riveiro Coello, 
Laura no deserto (ed. Galaxia).
Compostela, Barcelona, Europa durante a Segunda Guerra Mundial, Nova York a fins do século XX, son os escenarios dunha obra narrativa que ergue un sólido universo e entra na alma dos personaxes para nos falar cunha voz intensa sobre a identidade, a culpa, o amor ou a liberdade.
A novela iníciase na primavera de 1982 en Barcelona co achado dunha carta e vai espallando a súa trama por Compostela, Nova York e a Pobra do Caramiñal. O autor consegue artellar unha novela na que aventura vital, epopea social e interese narrativo se xuntan. As historias de Diana, que na Barcelona de 1982 atopa unha carta onde se descobre un pasado familiar ata daquela agochado; a dos últimos días da vida dun intelectual en Compostela, que lega ao seu fillo un enigma aínda non resolto; os intentos de Bob, un fotógrafo retirado de Brooklyn, por salvar a Bernie, un amigo que probou o suicidio, e a historia do destino ignoto dunha muller que se debate por conservar os últimos gromos de memoria. Unha trama na que a resolución das liñas narrativas lle pide tamén ao lector ou lectora un posicionamento perante o narrado que o ha implicar ineludiblemente na novela.